« Home | Wala damhang bug-at nga lakang sa Stonestomp » | Mga minugbong lilas ni "Victor Louie Villanueva" » | Phylum: Classified alternative music » | Salida features short flicks "by Victor Louie Vill... » | Oh, immortal one! » | you and me and the waves » | Made for masquerade » | Moonrising in Sta. Fe » | Morga's Creek » | Was it that hard for the two of us? » 

Thursday, May 04, 2006

Scrambled Eggs: "Kada Uli Hilot"


Sa unsang paagiha sa pagsilbi ang buot nimong mahitabo sa imong kinaham nga itlog? Malasado? Pinirito? O pina-omelet style? Silang Neil “Bomberman” Lumeran (bass), Nelson “Chang” Martizano (drums), Louie “Lewy” Espinosa (guitars) ug ang bag-ong kaplag sa pundok nga si Jay-r “Ichoy” Siaboc (vocals), mga taga dakbayan sa Toledo sa amihanang kasadpang bahin sa probinsiya sa Sugbo, nagkahiusa nga ang sud-ang itlog isilbi sa “scrambled” nga paagi.
Oopssss…ayaw sa diha pagtukiki o kaha buhi’g katawa sa huna-huna sa mga itlog ning mga tawhana nga ilang ipa-scramble. Atong klarohon nga ang maong paagi sa pagsilbi sa itlog nahitabo diha’s “Payag ni Badong”, ilang tambayan duol sa University of San Carlos-Talamban campus.
Wala lamang damha nga ang maong putahe nga ilang pagasaw-an matag abot sa takna nga magkasinabot silang mag-atubang ug panimo-timo mao na diay ang mohatod kanila sa pagsagop sa maong pangalan sa dihang ila nang gigama ang “Itlog sa Tiki”, ang ilang debut album nga gilusad niadtong 1996. Ug nga gimanghoran sa follow-up album nga “Tumbi, Yataki” nga gilangkoban sa trese ka kanta.
Kining maong duha ka mga albums produkto sa ilang determinasyon nga makakulit ug marka sa lokal nga paggama ug musika nga may impluwensya sa rock, pop ug alternative genres.
Balik sa Payag, nahimo kining inspirasyon sa dihang gigama nila ang “Humba”, usa ka track sa ilang unang album nga naghubit sa di malalis nga kalami sa usa ka matang sa sud-an nga kinaham sa mga Bisdak, “humba lami nga sud-an labina’g na’kay sili sa imong sawsawan, paborito nga paniudto sa Payag ni Badong…power kaayo.”
Ang Scrambled Eggs aduna nay ikapasigarbo may kalambigitan sa ilang pagpanukar tungod kay sa tuig 1996 ila nang nasakgaw ang titulong Artist of the Year sa tulumanong “Brown Underground Sounds” sa dyRT nga maoy nakapasugod sa konsepto sa Bisdak nga banda-banda. Ug bisan pa man sa pagbiya sa ilang kanhi bokalista nga si Glenn Sunico nga maoy nitagik sa kalab-anan sa ilang mga kanta, padayon ang musikanhong pagbatil sa Scrambled Eggs human sa tulo ka tuig nga pahulay.
Ang Scrambled Eggs mao ang paningog luyo sa “Kada Uli Hilot” nga basi sa kinawboy nga kana nga gipasikat ni Fred Panopio nga migamit sa istilong yodel.
Mamahimong kalataw-an o kaha may implikasyon sa double meaning ang maong kanta basi sa lyrics niining nagakanayon, “kung ako’y mulakaw, unya inig uli hilot; kung di ko kalakaw, dili sad ko makahilot; kada uli hilot, kada uli hilot,” apan gipaningkamotan sa Scrambled Eggs nga ang mosunod nga mga tracks may dugukan nga activism aron ikapasupot ang mga isyung sosyo-politikal.
Sama pananglit sa “Kutsara Tinidor”, nga usa ka pagtuki sa kadena sa grabeng kapobre nga nakapaalaut sa mga bata nga nahitumpayak sa gitawag ug musimos nga pagkinabuhi, “si Butsoy wala pay gikaon, si Amboy kanal ang giinum, si inday ukay sa basurahan karon. Patilawa di kamaong mag-tinidor, pakan-a di kamaong magkutsara.”
Gipaningkamotan karon sa Scrambled Eggs ang reprisal sa mga kanta sa unang album, “Itlog sa Tiki” aron mapalanog ilabi na gayud sa 93.1 Smash FM ang mga unod sa maong mga musikanhong mugna.
Ang Tumbi, Yataki album nga tag P175 mapalit sa Salonga Music Store – SM City Cebu, Backyard Studio sa Lahug, Kahayag Café ug Manu Ent sa Elizabeth Mall. Alang sa bookings, pakigsabot ni Neil nga maoy nibarog isip manager sa pundok, sa 0917-2476138, email
rem_gbg@yahoo.com. Bisitaha ang www.myspace.com/scrambledeggs, www.scrambledeggs.tk ug ilang friendster site: scrambledeggs@yahoo.com.
















10/31/2006 03:22:00 PM | Anonymous ianne said....   

the lyrics is to short and bitin masyado.........

pls... u should improve more!

10/31/2006 03:22:00 PM | Anonymous ianne said....   

the lyrics is to short and bitin masyado.........

pls... u should improve more!