« Home | Scrambled Eggs: "Kada Uli Hilot" » | Wala damhang bug-at nga lakang sa Stonestomp » | Mga minugbong lilas ni "Victor Louie Villanueva" » | Phylum: Classified alternative music » | Salida features short flicks "by Victor Louie Vill... » | Oh, immortal one! » | you and me and the waves » | Made for masquerade » | Moonrising in Sta. Fe » | Morga's Creek » 

Thursday, May 04, 2006

Aggressive Audio: Artist of the Month sa Handuraw

Human sa pag-isa kanila isip usa sa mga kinaham ug hugyaw nga banda nga ang basihan mao ang mga requests sa ilang mga kanta nga patukaron sa 93.1 Smash FM-Cebu’s Rock Fortress, ang Aggressive Audio bag-o pa lamang giisip nga Artist of the Month sa Handuraw Events Café (Artists Haven) sa Mabolo.

Kining maong pagpili kanila isip Artist of the Month base sa mga botar gikan sa ubay-ubay nga nagsunod kanila nga larino nang makahubit ug makakanta sa mga lyrics sa “Senior Citizen” aka “Ang Tiguwang”, ug sa lain pang matawag nga hit tracks sama sa “Lingin” ug “Kugmo” nga nilangkob sa ilang debut album “Pwerteng Lingina”.

Ang “Pwerteng Lingina” usa ka paagi sa pundok isip pagtuki sa mga butang nga lingin nga naglibot kanato nga matawag ug espeho sa atong kinabuhi nga nagtuyok.

Gawas sa pagsaksi sa pag-abot na sa panahon sa Bisdak rock gumikan sa nagkainit nga musicality sa mga local independent rock artists ug sa mga magdadayeg niining matang sa music style niadtong Marso 4 atol sa Bisrockers night sa Handuraw, usab akong nasaksihan kon giunsa sa Aggressive Audio, nailang experimental/blues/jam band, pagdani ug pag-aresto ang pagtagad sa mga mahiligon sa Bisrock.

Silang Eugene Corpin (vocals), Randolf Silvano (lead guitars), Sidney Alburo (rhythm), Joel Ablanque (drums) ug Vincent Ngalis (bass) wala magdahom nga balik sa ilang yanong sinugdanan sa dihang sila gitawag pa ug Teenage Chaos, mamahimo silang ingon niini ka agresibo may kalabutan sa ilang musika nga nakapakanlat sa atensyon sa mga tigpaminaw gikan sa sagad langyaw nga paningog ngadto sa Bisrock.

Usa ka matawag ug musical struggle alang sa Aggressive Audio nga likayan ang sobrang kagaan sa Bisdak nilang mga kanta nga typical sa novelty nga istilo sa musika. Apan dili kini malikayan kay ang mga sakop sa Aggressive Audio natural nga mga komikero, ug kining kagaan sa ilang kanta daw gapas nakapahimo sa ilang kanta nga daling nakatuhop sa alimpatakan sa mga tigpaminaw. Dali masakyan ang lyrics ug tuno sa mga tracks sa album tungod kay kini audio-friendly man.

Sama pananglitan sa “Medya Galon” nga kon buot hunahunaon daw simple lamang kini nga pag-ihap nga ingon ug countdown susama sa paghatod sa natad sa siyensa ug laboratoryo ngadtos kawanangan. Ang “Medya Galon” nakapagitik sa akong gusok ug nakapahurot sa akong kusog ug ginhawa sa pag-apas ug ihap sa kantang may kalabutan sa mga manginomay ug tuba.

Sugdi sa “ang baynte nahimong baynchingko,” ug ang pag-ihap mahitabo sa paatras nga pamaagi, nga matapos sa “dos, uno, y medya” ug dayong bunal sa katapusang pulong nga inubanan ang pwersa alang sa igong kinahanglanong impact sa “galon!” Ug karon duwa-i sa imahinasyon nga anha pagasugdan ang paatras nga pag-ihap gikan sa “ang baynchingko nahimong singkwenta”. Tan-awon nako kon asa kutob ang bulhot sa inyong gininhawa sa pag-roll back sa mga numero nga mouli sa “dos, uno y medya… galon.” Bisan tuod ug matawag ug linawgaw, apan sa mga nagkalingaw nga Bisrockers niadtong gabii sa ilang pasundayag, lakip ang akong kasingkasing nga nag-jogging sa ilang gibuhat. Ug kon ikaw rockista nang daan, dayag na lang nga ang matag bunal sa drums maka-uyog sa imong paghatag ug bili sa lokal nga talento.

Ang “Lingin, Tangkong, Hanggang Kailan, ug Feeling Lang” pipila lamang sa mga kolaborasyon sa pagtagik ug liriko nilang Eugene ug Sidney kansa mipasiaw nga wala silay suliran mahitungod sa pagsulat sa lyrics, aduna lang pag-abot sa mga chicks.

Sa pagtan-aw ug balik sa ilang naagian, nahibaw-an ning tagsulat nga sa usa ka band showdown diin si MC Rey sa local rap-hiphop group Brownian Method dili makalitok ug tarong sa pulong “chaos” sa ilang karaan nga ngalan - ang Teenage Chaos, mao nga sa dihang pag-anunsiyo niya iyang gibunyagan ang pundok ug Aggressive Audio.

Wala mamarog ang Teenage Chaos sa pagtoo nga dunay laing banda nga gitawag, apan sa dihang gisenyasan silang MC Rey nga sila mao na ang sunod motukar, didto na nagsugod nga nakatatak na ang maong pangalan kanila.

Si Eugene ug ang kanhi lead guitarist nga si Archie Uy nagsugod isip mga kolitos dihas Mabolo Parish Church ug tungod kay katalirongan man sila diha sa Mabolo, normal na lang nga magtukar-tukar sila may kalabutan sa mga kanta sa simbahan.

“Kanang Senior Citizen play-up jud na siya sa usa ka charismatic song kay nindot man gud ug tuno nya okey ra pud dali siya masakyan,” pagpasabot pa ni Eugene mahitungod sa local chartbuster nga “Senior Citizen”, nga gianggaan ug “Ang Tigulang”.

“Ang Tigulang bisan bako, maningkamot, mobarog, motindog, aron molabyog,” singgit sa kinabag-an atol sa Bisrockers night sa Handuraw nga miwara-wara sa ilang mga kamot ug mitagtag sa ilang mga ulo ug misadsad sa ilang mga tiil atol sa gihimong pasundayag sa Aggressive Audio.

Wala palandunga sa Aggressive Audio nga maabot sila ug ingon niini na kalayo may kalabutan sa gilawmon ug gilapdon sa ilang musika, nga gilarawan nilang “pakatok ra lagi wa dyud mi motoo nga mo-click ni”. Apan silang tanan nagkahiusa sa pag-ingon nga layo rang makab-ot sa grupo kining maong kalampusan kon wala pa si Archie kansang presensya ana-a lang gihapon bisan pa man ug ato-a siya gawas sa nasud nagtrabaho.

“Naka-promise mi ni Archie nga di mabungkag ang band,” nagkanayon si Sidney, “so that wherever the road may take us, we vowed to be intact, as Archie also promised to join us as soon as he comes home. Kay mao ra gyud ni iyang gusto nga tibook lang gihapon ang iyang nasugdan.”

Apan sa wala pa molarga si Archie, nakaabag siya sa recording sa upat ka kanta diha sa Backyard Studio Project, ug mapasalamaton kaayo sila kang Micmic Demetrio, kini nahibal-an ning tagsulat gikan sa manager sa Aggressive Audio nga si Ysai Perez. Kining upat ka mga kanta nilangkob sa ilang ikaduhang album nga wala pa mapahaumi ug titulo.

Usab, ang pundok mapasalamaton nilang deejay Ramil Dizon ug Segundo Bré Abrea, Jr. sa 93.1 Smash FM sa pagpakanaw-kanaw sa kahanginan sa mga requests sa mga Bisrocker fans. Si Randolf mapasalamaton sa tanang taga barangay Taytay, Badian sa ilang suporta, samtang si Joel magpasalamat sa tanang kahigalaan ug kasilinganan sa Guadalupe nga sila nihangop sa musika sa Aggressive Audio.

Si Sidney, Eugene ug Vincent gusto magpasalamat sa tanan nilang mga magdadayeg dihas Cabantan, ug labaw sa tanan sa ilang manager nga si Ysai Perez nga maoy nabundakan sa tanang “dirty works”.

Ang Aggressive Audio aduna nay nabuhat nga mga pasundayag sa Casbah sa FGU sa Ayala ug matag pasundayag nila dili gayud malikayan nga makamugna ug labi pang paghangop sa Sugbuanong pinulongan.
Dayag na lang nga ang Aggressive Audio agresibo kaayong mipakatap sa paghatag ug bili sa tam-is nga pinulongan sa habagatang bahin sa Pilipinas.


Sa gustong makabaton ug kopya sa ilang CD balor ug P150, lakat sa JB Music o sa Kahayag Café (igsoong establisamento sa Handuraw Events Café). Dugang impormasyon ana-a sa www.myspace.com/aggressiveaudio. Ug sa gusto modapit sa Aggressive Audio sa ilang dapit, pakigsabot kang Ysai Perez sa 09189493911.