« Home | Phylum: Classified alternative music » | Salida features short flicks "by Victor Louie Vill... » | Oh, immortal one! » | you and me and the waves » | Made for masquerade » | Moonrising in Sta. Fe » | Morga's Creek » | Was it that hard for the two of us? » | Manunggal! » | Demise » 

Monday, February 20, 2006

Mga minugbong lilas ni "Victor Louie Villanueva"

Mga minugbong lilas
ni “Victor Louie Villanueva”

Susama sa mga batan-ong bulahan kaayong nakahupot ug katakos sa pakig-indigay sa natad sa arte, ang 21-anyos nga si Victor Louie Villanueva mipalambo sa iyang hilig sa pagdibuho, ngadto sa combat sports, ingon man sa advertising nga mao ang natapos niyang kurso sa University of San Carlos-Talamban campus.

Bisan dili man tuod makita ang iyang kontribusyon sa lilas “Ang Pagdadalaga ni Maximo Oliveros” nga gigaling sa CineMalaya, isip marketing assistant ubos sa pundok ni Ms. Amor Olaguer sa UFO Pictures, apan si Victor usa sa nakapahugyaw sa nakalabay nga Salida nga gipahigayon sa Handuraw Events Café diha sa Mabolo.
Ang iyang kaigmat, kalawgaw, kalantip sa pangisip makita sa iyang duha ka mga mugna – mga minugbong lilas nag-ulohan ug “Bitin na Pagmamahal” (Interrupted Love) ug “Naglaway”.

Ang duha niya ka mga mugna nahilakip sa napulo ka minugbong lilas nga gipasundayag alang sa Salida, ipahigayon matag tulo ka bulan diha sa Handuraw, igsoong establisamento sa Kahayag Café.

Ang ubang mga lilas nga nahilakip sa screening mao ang mga mugna nilang Jurly Maloloy-on, Jr. ("The Witness" ug "Sila" ni Denis Judilla ug Benjie Ordoñez), "Kadauwan" (Everytime It Rains) by Benjie Ordoñez nga migamit sa huni sa kubing (jaw harp) sa indie reggae band Balde ni Allan; "Mata" ug "Pusod" ni Cheryl Baldicantos, "Zwangtta" (Koreano nga pulong buot ipasabot “loser”) ni Michael Barrientos, "Miko" ni Paolo Dy, "Night Shift" ni JK Go, ug "The Haunted" ni Jerrold Terog.

Ang mga nanan-aw nahugyaw sa baleg usa ka gutlo niyang “Bitin na Pagmamahal” nga nakadaug ug ikaduhang ganti sa “Smart Cuts”, usa ka bangga sa panglilas pinasiugdahan sa MOV International Digital Film Festival 2005. Ang maong lilas may kalabutan sa konsepto sa short messaging service nga gipahaum sa karaang panahon. Giduwaan sa maong salida ang “fantasy elements” diha sa posibilidad sa paggamit ug “text service in typical Filipino courtship” sa panahon nga ang Pilipinas ilawom pa sa pagdumala sa mga Katsila. Ang ubang detalye niini, ana-a nakapostada sa www.movfest.com.

Ug susama usab sa mga mahiligon sa natad sa panglilas, si Victor miisip sa “Citizen Kane” ni Orson Welles, sugilanon sa usa ka publisher nga nailhang si William Randolph Hearst, nga usa sa mga labing maayong lilas nga nagaling.

Bisan pa man ug gipili ni Victor nga ang iyang mga mugna magtuki sa “play-up of fantasy elements”, dili niya ikalimod nga ang rebolusyong gigamit sa Citizen Kane may kalabutan ang “cinematic and narrative techniques and experimental innovations in photography, editing and sound” mao ang iyang gihimong inspirasyon “to move on with innovations in filmmaking along with a host of other cinematic influences.”

Ug usab dako ang iyang respeto sa nigama sa “Battle Royale” ug "Princess Mononoke" (animation), parehong Hinapon nga salida nga alang kaniya repleksyon sa iyang personalidad.

Malipayon kaayo si Victor nga ang iyang mga mugna nahilakip sa Salida nga gipasiugda sa Sinebuano. Ang Salida usa ka kalihukan nga naglangkob sa mga mugna sa mga Bisdak nga mahiligon sa paggaling ug mga lilas. Laraw niini mahatagan og igong kahibalo ang katilingban nga aduna diay mga salida nga ginama og Bisdak. Ang Sinebuano usa ka gamay nga pundok sa mga gitawag ug “passionate independent filmmakers” nga inyong mahimamat, makasandurot ug makukabildohay pinaagi sa ilang Visayan online community – ang “iStorya.net”, usa ka message board alang sa mga hilisgutanan may kalabutan ang independent filmmaking.

Bisan pa man tuod ug si Victor dili sakop sa Sinebuano, padayon ang iyang suportang gihatag sa Sinebuano alang sa usa ka kawsa – kini mao ang pagpalambo sa independent digital filmmaking dinhi sa Sugbo ug nga ipahibalo kini sa kadaghanan labi na niadtong mahiligon usab niining maong natad sa arte.

Layo pa nga mamahimong “movie hub in Asia” ang Cebu, sukwahi sa unang gikataho, tungod kay “back to square one in the field of moviemaking” man ang Sugbo, pahayag pa ni Sinebuano executive director Benjamin “Benjie” Ordoñez.

Dako-dako pa kuno ang ilang trabahoonon alang sa pagpahibalo sa katawhan nga ang mga lilas gipasundayag sa Salida naghubit sa inspirasyon sa mga karaang Sugbuano nga mga sine sama sa “Manok ni San Pedro”, “Badlis sa Kinabuhi”, “Bugas Mais”, ug “Mutya sa Saging Tindok”.

Sa paglaum nga ugma damlag makagama ug tinag-as na nga pelikula, si Victor Louie Villanueva mitoon pinaagi sa mga workshops may kalabutan sa actual shoots diha sa International Academy of Film and Television isip pangandam sa mas halapad nga tabil. Gikuting niya karon ang produksyon sa iyang duha ka mga bag-ong minugbong lilas - comedy ug fantasy – nga hayan mahiapil na usab sa sunod nga hugna sa Salida alang sa pagduso sa “local digital filmmaking.”

4/19/2006 04:08:00 AM | Anonymous RennyBA said....   

Hello Eleanor. I don't understand you're language so I can't comment, but wanted to say hi as I stopped by:-)