« Home | Königs, Salida and the Handuraw experience » | A SPACE IN SPACE Maria Eleanor Elape Valeros Cool... » | The Kadangyan mystique The life they live is their... » | A SPACE IN SPACE Maria Eleanor Elape Valeros Visit... » | Junior Kilat to spray the bratatats on Sinulog day... » | Christafari: Cultural bandit or reinventor of the ... » | Return to Gigaquit, return to my Shire! » | The Marriage Bed » | The Digital Divide » | Love and sex according to the gospel of Paulo Coel... » 

Wednesday, January 25, 2006

Nganong Ni-Enter!


Nganong Ni-Enter! debut album sa Königs gilusad
Maria Eleanor Elape Valeros
Bisita.a ang www.philstar.com

Hugyaw ang nahitabong paglusad sa pinakaunang album sa Königs, usa ka Bisdak hip-hop nga pundok sa ilang pinakaunang album nga may ulohan "Nganong Ni-Enter!" nga adunay dose ka mga kanta nga gipahaum sa tuno, bunal, ug paningog sa hip-hop/rap music.

Nagkauyon gayud ang tulo ka sakop - silang Naw-t-dog, Garvie ug Brent - sa pagbunyag sa pundok ug Königs (gikan sa pulong nga Swiso-Aleman, ang koenigs nagakahulugan ug "kings" kon mga hari. Ang saktong pagbasa niini mao ang koi-nigs.) Tungod kini kay gipakahari man nila ang talento sa Bisdak sa pamuhat ug mga huni ug awit. Tam-is kaayo palandongon diha sa usa ka linya sa ilang mugna ang: Dili titulado/ngano?/Dili ilado/ngano?...Cebu ni bai/Dili mo katandog sa among garbo/ayaw'g labay kon makakita kag talento.

Ang "Nganong Ni-Enter" nga silbing carrier track usa ka maalamon nga paggaray-garay sa mga pulong nga nagbatbat may kalabutan sa paghulagway sa usa ka tawo nga nahitumpawak sa pagpayuhot ug paggamit ug ginadiling drugas, ug ang sangpotanan sa maong bisyo - ang pagkawala sa direksiyon ug bili sa kinabuhi, lakip na ang saktong pangisip. Masungogon kining nagkanayon: Nganong ni-enter man! Nganong gisugdan! M'o na asa na man natanggong nas prisuhan/naay kwartahan sa rehab gipadala's ginikanan/tungod sa bisyong way ayo/daghan nang nawad-an.

Bag-o pa gawod nga haw-as ang pundok sa ilang malamposong pakigtambayayong sa Dice and K9 Mobbstarr nga maoy nigama sa official soundtrack sa lilas "Enteng Kabisote 2" nga gibitoonan ni Vic Sotto, ug usab sa usa ka gig atol sa nilabay nga Sinulog. Ang tulo ka sakop sa Königs nga managsilingan sa Talisay City - si Naw-t-dog nga kanhi sakop sa Brownian Method, si Garvie nga maayo kaayo modala ug pinasagitsit sa likod sa mga kanta aron katagaan ug igong "hoomp" ang bunal sa tuno sa hip-hop, ug ang balaknon usab nga si Brent nga maoy nangunay pagmugna ug pag abanid sa mga pulong sa "Nganong Ni-Enter!"

Nausban pa gayud ang paghugop sa mga Bisdak nga mahiligon sa hip-hop sa dihang gilusad na sa katapusan ang ilang debut album diha sa Handuraw Events Café sa Mabolo niadtong miaging Biernes atol sa "RNB Hip Hop Rap Nights".

Ang maong album nga gitawag sa tulo ug "labor of their love to propagate Bisdak hip-hop culture" gi-mix ug gi-master sa 6000 Goonz label ni Dice Rosaroso sa Dice and K9 Mobbstarr, gipagawas sa Alpha Music, ug gipakatap sa Harmony Music.

Gawas sa makalingaw kaayong paghulagway sa mga abusado nga nang-enter paggamit ug ginadiling drugas, ang album aduna usay track nga "Pop Chick" kauban si Hi-C sa Dice and K9 Mobbstarr mahitungod niining usa ka ambongan nga lalaki nga buot mosakmit sa kasingkasing sa usa ka dalaga, apan bisan pa man sa iyang ka chickboy maglisud sha pagduol. Dili man gani makasugakod bisan "hi" na lang o "hello" tungod kay permi na lang siyang maunhan sa kaikog, kauwaw ug kataha.

Lain pang makalingaw nga track mao ang "Ungo Ka!" nga bunal kaayo ang hardcore nga elemento niini apan nakapasamot sa pagpatigbabaw sa panaglubid sa novelty ug hip-hop. Mahitungod kini sa dagway sa usa ka tawong palahubog ug kusog pa gyud moyupyop. Daw manggitik ang mga singgit sa tulo: Kalkag kag buhok, ungo ka!/ Baho kag ilok, ungo ka!/ Lagom na'g lagos, ungo ka!/ Sige lang kag yupyop, ungo ka!

Ang ubang mga kanta lagmit gayud nga adunay maigo ug mayatakan tungod kay may kalabutan kini sa kauna-unahon sa mga babaye ngadto sa mga lalaki, hinungdan nga buhaton lang sila ug pulutan sama sa gibatbat dihas Ms. Appetizer. Ug ang usa mao ang kalaay sa kalibutan ug sa mga buluhaton kon walay klaro. Gisaysay dihas "Wawart" nga maayo pa ang patay kay naa pay molimos ug kwarta. Makapahimuot nga ang buta misiyaok na lang ug: "Asa na mang kwartaaaaa?"

Samtang ingon niini ang dagan sa mga tracks sa album, nahinabi ning tagsulat si
Naw-t-Dog alang sa pagtino kon kinsa ang iyang giigo sa "Funky Juan". Pulong pa ni Naw-t-Dog, ang maong rap naghulagway sa iyang kaagi sa dihang iyang gipakita ang iyang dakong pagtamod nga may ugma ang hip-hop music sa Cebu. Iyang gusto lang pahibaw-on ang matag mahiligon sa rap nga ipadayon ang gugma sa maong natad sa arte bisan pa man ug dunay mga tawo nga kusog manggamit ug mangwarta sa ilang mga pasundayag. Dinhi nakat-on ug leksiyon si Naw-t-dog nga ihatag ngadto sa tawong angayan ang iyang pagsalig ug ilhon pag ayo ang iyang mga katrabaho.

Ang tulo malipayon kaayo nga nisaysay nga sa AstroPlus pa lang daan sa SM City Cebu, ang ilang album mihalin na ug 50 kabook, nga matawag na ug usa ka kadaugan sa usa ka pundok nga pasulbong pa lamang.

Silang Naw-t-dog, tinun-an sa Computer Science diha sa Asian College of Technology; si Garvie nga tinun-ang ug Mass Communications sa University of San Jose-Recoletos ug si Brent nga ana-a sa Southwestern University alang usab sa pagtoon ug Mass Communications nakiglambigit sa SOS Village, usa ka institusyon nga nag-atiman sa mga ilong tuwapos, pinaagi sa pagbuhat ug kanta isip "jingle" ug ingon man sa ang Nganong Ni Enter! nahilakip sa Philippine Red Cross Album, usa sa mga kontribusyon sa pundok sa pagtigom ug pundo alang sa mga buhat sa kalooy. -
Maria Eleanor Elape Valeros, mga hulagway kuha ni Chendrina Villarino Rosaroso

3/18/2006 01:48:00 PM | Anonymous unknown said....   

kinsay na ay lyrcis sa mga kanta sa konigs