« Home | The Vanilla Hills Experience » | Atop Prayer Mountain » | Maze » | The Pres. Ramon F. Magsaysay, Sr. Millennium Trek » | Of boulders and river-trekking » | Rainy Tuesday morning under Armor's Psychedelic Su... » | Walang tulugan for German "Kuya Germs" Moreno » | ASMS Batch 90 » | Balak ni Eleanor... » | The kindred spirit connection » 

Monday, January 30, 2006

Bag-ong Kaplag...

Bag-ong Kaplag: Si Armor ug ang iyang mga musikanhong mugna
Tinagik ni Maria Eleanor Elape Valeros
Mga hulagway kuha ni Chendrina Villarino Rosaroso

Mibutho sa buhatan ning maong pamantalaan si Armor, usa ka bag-ong sulbong nga electronic folk artist, bag-ohay pa lamang gikan pagkahuman sa iyang “live” nga pasundayag sa Café Shang diha sa Mactan. Miagi siya pagtuyo ning maong pamuhatan alang sa paghatag og katin-awan mahitungod sa iyang mga musikanhong mugna nga inanay nang nakakablit sa pagtagad sa mga mahiligon usab sa huni nga pinahaum sa electronic folk nga kategorya sa musika.

Bisan pa man dili kadto Martes nga kaadlawon, apan ang sayong kabuntagon mibagis sa pamayhon sa babaye nga iyang gihulagway diha sa iyang orihinal nga komposisyon “Rainy Tuesday Morning” kansa nangantalita sa yanang nga namugna sa bunok sa uwan sanglit nagpanghadlok man kining mahugawan ang iyang lapa-lapa kon makayatak sa lapokong dalan.

Diha hinoon kadtoy kalit nga ulan nga inay mobundak sa aspaltadong dalan, o mobati-bati pagbunal sa sin nga atop, nahimo naman hinoong mananoy daw huni nga namugna sa silindro ni Armor. Ang “Rainy Tuesday Morning” usa sa iyang orihinal nga komposisyon diin iyang gilubid ang mga impluwensya sa iyang mga kinaham nga mga mag-aawit ug banda nga sama sa Asin, Joey Ayala, sa inilang U2 sa Britanya, ug si Bob Dylan ug Beck and The Blue Man sa Tinipong Bansa sa Amerika.

Ug labaw pa gayud nga sa dihang nahapit si Armor ning maong buhatan, ang adlaw nahikatulog pa sa likod sa nanghuyhoy nga abaga sa kasadpan samtang gikugihan namo pag-ugkat gikan sa Internet ang iyang laing mugna, ang “Psychedelic Sun”, kuyog sa akong kahinam nga nakigkumbati pagsukit-sukit kaniya mahitungod sa iyang inspirasyon nga naglimin dihas mga pulong, pagbati, ug sepra nga maayo kaayo niyang pagkabalay samtang siya nagasimba sa Haring Adlaw tungod kay nibidlisiw man kini dihas balaan ug makasasala sa walay pagpalta ug pagpinig.

Si Armor, kansa Ilonggo ug kaliwatan, midalit sa iyang katakos sa pagkuskos sa iyang sista nga gidunganan sa pagtayhop niya sa silindro. Sa pagkakaron, siya makita nga solong mopasundayag sa iyang katakos sa pagtukar niining mga instrumentoha ug usab sa drum machine dungan sa iyang pagkanta.

“Sometimes with the sequencer, tribal instruments and toys I circuit bended. But live performance is just an extension of my music," matud pa ni Armor.

Apan alang kang Armor ang iyang matuod nga pasundayag naa sa iyang paggahin og panahon sa pagplano, sa recording ug sa mixing sa iyang mga kanta.

“I become a scientist when my fingers move the different knobs and faders of the mixing console. I become a poet when I scribble the rhymes and metaphors. I become a rebel when I take off my shirt and plug the guitar in front of the microphone. And when I sing, I become a rock star!,” dugang pamahayag ni Armor.

Napulo ug siyam sa mga koro sa iyang kap-atan ka mugna nahipatik nas www.fiestamundo.com/armor. Ang kinatibuk-an niining maong mga kanta mapalgan sa www.songplanet.com/armor sama sa nahisgutan nang "Rainy Tuesday Morning" ug "Psychedelic Sun".

Musika nakapaaghat kang Armor nga mobiyahe

Ang pagkadi ni Armor sang banwa sa Sugbo indi lang gid para sang iya mga kabiyanan kag mga kautoran na adi di. Gibuhat kini ni Armor tungod kay nakadungog man siya sa nakagamot nang gugma sa mga Sugbuanon sa natad sa panggama og mga huni’g awit.

"I am amazed at the Cebuanos’ love of music that nestles deep down in your culture," ni Armor pa.

Nahadiin-diin na si Armor, apan dinhi lamang sa Sugbo niya nakita ang dakong kahangop alang sa mga independent musicmakers nga pareha kaniya.

Nahimugso niadtong Enero 6 sa Jaro, Iloilo City, si Armor nakabaton sa ngadto-ngadto sa abilidad pagsulat ug kanta, ingon man mga “jingles”, ug nakat-on ug creative writing sa dihang nagtoon siya alang sa pagkab-ot sa Bachelor of Science in Mass Communications major in Journalism degree gikan sa West Visayas State University.

Mibiya siya sa nasud nanimpalad dala ang katakos sa pagkanta sa Sur Beach Hotel sa Oman niadtong 1999; sa Hilton Hotel sa Manama, Bahrain (2000); sa New Peninsula Hotel sa Dubai (2001). Apan gilaay si Armor sa pagkanta sa mga huning gipasikat sa mga laing music artists, labi na gyud sa mga langyaw. Alang kaniya dakong insulto sa iyang talento ang iyang gibuhat ug nga kon dili pa lang kuno tungod sa konsiderasyon sa panapi, sigurado kuno nga sa unang gabii pa lang sa iyang pagtugtog hinanali niya kining gitalikdan.

Si Armor padayon sa iyang tim-os nga tingusbawan

Nagplano siyang magpagawas og CD sa iyang “live acoustic performances” dinhi sa Sugbo. Iya kining matawag og halad alang natong mga Sugbuanon nga misuporta sa klase sa iyang musika. Matala nga kalampusan ni Armor ang pagkahiapil sa Top 400 artists sa songplanet.com sukad pa sa Hulyo 2004. Siya mao lamang ang Pinoy nga independent music artist nga nahilakip sa maong talaan. Siya ana-a karon sa ika 59. Ang iyang laing musikanhong mugna nga nag-ulohan og “We Are All Atoms” ana-a nanganaw-kanaw na karon sa 93.1 Smash FM dinhis dakbayan.

Sa dili pa dad-on ni Armor ang iyang musika sa Davao, mapaminawan siya nga live mopasundayag diha sa Windsor Castle (Ninoy’s Payag) dalan Escario matag Miyerkules sa alas-9 sa gabii. Sa laing mga adlaw naa siya sa Café Shang sa Mactan diin kadtong buot makabaton ug kopya sa iyang upat ka mga album – Ice Cream, Cakes and Chocolates, Sunshine Satellites, Walking on a Third World Street ug Primitive Device, makahimo sa pagpalit samtang siya mokanta ug live napulo sa orihinal niyang mga mugna dihas gikasulti nang mga dapit-pasundayaganan.

Human unya sa misyon ni Armor sa dakbayan sa Davao pagpakatap sa iyang musika ug pag-apud-apud sa iyang CD, mobalik siya sa Iloilo alang sa laing obra, ang ikalima niya nga album, usa niya ipadayon ang iya nang nasugdan dinhi sa Sugbo. Kabay pa nga updan naton si Armor sang iya panakayong musika! – Maria Eleanor Elape Valeros, mga hulagway kuha ni Chendrina Villarino Rosaroso

Caption:

Si Armor mihalad ug usa sa iyang kap-atan ka orihinal nga komposisyon, nga may ulohan “Love” dinuyugan sa gitara ug silindro. Mga hulagway kuha ni Chendrina Villarino Rosaroso